ContaCaTiConto
[Antologia de literadura in sardu]

 C O N T O S · R O M A N Z O S  · P O E S I A S  ·  I N T E R V I S T A S · D I T Z O S

Accueil > Les auteurs > AMOS OZ

AMOS OZ

AMOS OZ, nàschidu in Gerusaleme su 4 de maju de su 1939, mortu in Tel Aviv su 28 de nadale de su 2018. Aparteniat a una famìlia de emigrantes russos e polacos. Fìgiu de Yehuda Arie Klausner e de Fania Mussman (chi si fiat ochìida a manu sua cando isse teniat 12 annos). Su babbu e sa mama si nche fiant fuidos in su 1917 dae Odessa a Vilna, e dae cue a su Mandadu Britànnico de Palestina in su 1933. In su 1954, Oz fiat intradu in su kibbutz Hulda. Dae tando s’ait cambiadu su sambenadu in Oz , chi in ebràicu cheret nàrrere “fortza”.
Aiat istudiadu Literadura e Filosofia in s’Universidade Ebràica de Gerusaleme, dae su 1960 a su 1963, e aiat publicadu sos primos contos curtzos suos. Dae su 1991 est istadu membru de s’Academia de sa Limba Ebràica.
At iscritu deghinas de romanzos bortados in deghinas de limbas. Est cunsideradu unu de sos iscritores màassimos de Israele.
Cun s’òpera chi semus publichende, cherimus fàghere connòschere Amos Oz a su pùblicu sardu. In mesu de amigos tenet unu valore particulare, ca s’autore contat sa vida e sos pessonàgios de una comunidade cumplessa e particulare, sa de su kibbutz, chi Oz connoschet bene ca est istadu pro a su nessi trinta annos pròpiu in unu de custas comunidades —su kibbutz de Hulda— chi podimus definire “ùnica” e distinta dae àteras realidade colletivìsticas, comunitàrias o comunìsticas.
A pustis, pro una bintina de annos, Oz si nch’est tramudadu a Arad, una tzitade de 23.000 abitantes, in s’oru de su desertu de su Neghev, a unos 25 km ad ovest de su Mare Mortu e a 45 km ad est de sa tzitade de Be’er Sheva.
Dae unos bator annos, istaiat prus chi no àteru in Tel Aviv, pro istare a curtzu a sos nebodes.