ContaCaTiConto
[Antologia de literadura in sardu]

 C O N T O S · R O M A N Z O S  · P O E S I A S  ·  I N T E R V I S T A S · D I T Z O S

Prima pàgina > AUTORES SARDOS > Demo chircat domo

Contu:

Demo chircat domo

lunis 15 làmpadas 2020, de GONÀRIU CARTA BROCCA

Salude bona zente… In antis de totu pedo iscusa si carchi umanu s’intènderet ofesu dae lèzere custas paràulas chi unu cane che a mimi s’atrivit a iscrier. Isco bene chi nois canes depimus istare che canes: no apeddare cando su mere non cheret, non fàghere sos bisonzos nostros intas si semus crepande, non pessare chin sa conca nostra, nen contrariare su mere chi totu ischit… beh! Cuasi totu.
Jeo mi naro Demo. Sa mere mia m’at postu custu lùmene… non po incurtzare sa paràula democratzia e nemancu demografia, ma in onore de Democrito, su filosofo de Abdera, po amentare sa Grecia antiga. Issa imparat sos pitzinnos in pitu de sas cosas gregas e latinas de sas cales ischit totu… cuasi totu. Est gasi cumbinta de sa missione sua, chi chircat de aculturare intas a mimi e cussu poveritu de su maridu. Naro poveritu ca, jeo poto fagher finta de iscurtare, ma issu depet currispòndere a su chi sa muzere li narat, si nono sa bria est assigurada.
Sa mere mia no est mala, est solu cumbinta de essere sa menzus e de depere inditare a totu ite faghere, ite pessare, ite sonniare. Su maridu, poveritu, no ischit sas cosas che a issa e s’intendet unu gradinu prus in bassu d’edda. Cando briant, però, sos gradinos prus in bassu diventant duos, tres, deghe… s’intendet propiu crastadu. Tando, no aende chin chie che l’iscurfere mi dat pagas puntadas de pede a fura de sa muzere; ca la timet a freas.
Gasi, a mimi mi togat a suportare custu poleddone de maridu e galu peus a suportare sa muzere, chi pessat d’essere sa saviesa fata pessone. Cando mi giamat, mi narat “su coro miu” e m’istrinat paràulas de mele; mi contat chi est mama mia, basàndemi e istringhèndemi comente chi a beru sia su fizu suu. Si però non fago totu su chi cheret issa, ja mi lu pigo su silìssiu…
Fortzis m’istimat a beru comente solu issa ischit istimare: pessande e disinnande in parte mia. Fizos non de cheret, ca sos fizos sunt fastizos, repitit a ispissu. De su restu, chin su travallu chi faghet, no nd’at a beru àsiu de pesare fizos, chin totu su chi sos fizos cherent narrer: non dromire cando s’intendent male, acumpanzare a iscola, a plaestra a su dutore, a essere semper chin su coro puntu, si istentant a torrare su sero... Nono nono!... menzus unu cane. A nois nos podent reudare sa prima die chi non lis ruimus prus in zeniu o nos podent lassare solos totu su tempus chi cherent; non protestamus mai. Però, unu pagu de bene pesso chi mi cherzat… Una die chi m’intendio male, m’at sètidu in màcchina e zutu deretu a su dutore de caddos; a tempos d’oje, prus dutore de canes chi non de caddos. Comente ipi narande, in sa cursa po andare a s’ambulatoriu, sa mere mia, chi no est propiu una Nuvolari ghiande sa vitura, ch’at leadu unu ambulante senegalesu e non s’est mancu frimada po ‘ider ite s’aiat fatu. Su poveritu s’aiat solu truncadu sas canneddas de s’anca. Pustis chi sos carabineris l’ant frimada, cussa santa fèmina, zenerosa che a semper, l’at fatu s’assiguratzione chin sa cale su moritu at retzidu una barca de dinare e sas malas santas dies de mama mia… Beh un’ecantu at rejone!... De custos irfadosos de nieddos be nd’at peri tropu, narat mamai. S’arrumbent in logu issoro e non bènzant a truncare sas ancas a sa zente onesta e de vera fide, batunde maladias, costumassias istranas e idulos chi no istant ne in chelu ne in terra.
S’unica niedda chi issa suportat est cussa chi est dande cara sa mama sua antziana: malàida de diabete e doloreddos de betzesa; ma prus che àteru malàida de lambidòre e de mal’inzìle. Si tatat de durches, peri ischinde ca non de podet papare. Tando, cando s’intendet male, chel’iscurfet chin sa teraca niedda, dae sa cale diat cherrer ubidièssia assoluta e imbrenugones. Sa povera “badante” chi totu ‘etat a palas, pagada su tres unu de cantu diat leare una teraca nostrana, iscurtat rassinnada e tirat a dae nantis, pessande a sos parentes famidos lassados in logu suu.
Jeo, Demo, m’intendio un’ispessia de fizu prediletu de custa savia e ricca mere mia. Naro m’intendio ca oje apo cumpresu cantu egoisticu fiat su bene chi issa bandiat a su mundu. Unu sero, cumbinta chi jeo no essere iscurtande, at nadu a su maridu chi, sa chida imbeniente mi diat aer jutu a su dutore de caddos po mi crastare. Po su bene miu naraiat issa. Po mi fagher assetiare sas notes chi mi ponio a orulare e po non currere prus ifatu de sas canes in calore, cando issa mi bogaiat a passizare.
Disisperadu, pessao e torrao a pessare comente fuire dae custa mere luntzìna chi po sa trancuillidade sua fiat pronta a irmutzurrare po semper su fizigheddu suu istimadu…
Su manzanu ifatu, su maridu, pretzetadu dae sa mala fèmina, m’aiat bogadu a foras po fagher sos bisonzeddos mios. Comente a semper, s’òmine aiat irgantzadu su molinete dae sa collana chi jughio in trugu e m’aiat nadu: “Bae! Mancari andes in unu caddu de fogu, e si carchi macchina ti nche leat ja apo a prangher e zai apo a tzelare…” S’odiu chi aiat po sa muzere, lu colaiat intreu intreu a mimi. Ma si issu fiat unu doddoi chene corazu, jeo non mi la sentio prus de bivere in una domo in ue nemos m’istimaiat. Nuscande nuscande mi fio inneddadu intas a cando no apo bidu prus cuss’òmine, issu sì, crastadu a beru dae su malu istripìle de sa muzere chene coro nen sentidos.
Non mi la colao gasi male in sos caminos… caligunu mi pigaiat e puntadas de pede, ma, medas àteros, mi mutiant e mi carignaiant, dandemi cosigheddas bonas de mandigare. A m’acollozìre po semper, cussu fiat un’atera paja de mànigas. Donniunu aiat un’iscusa po no lu fagher. No aio una domo inue biver presoneri de sos òmines, ma istao che lardu in sale. Siguramente meda menzus de sas prufessones mannas de òmines istranzos bènnidos dae cudd’ala de su mundu: zente chene lùmene e chene cara. Pantamas de pessones chi nemos pariat bidere, nemos cheriat, nemos lis naraiat una bona paràula o lis daiat carchi cosighedda bona de papare. Sas ànimas airadas de s’isula nostra, seperaiant de che l’imbolare a s’arga, menzus de no la dare a custos culi-tapulados, chi mintiant in sa zente umbra e pore. Sarvu chi no èsserent de cussos poveritos bonos, chi travallaiant debadas in domos e campannas de sos òmines de custu logu… Sos òmines… Mah! A beru no los cumprendo. Nois canes andamus d’accordu chin biancos, chin nieddos e chin pintirinados. Totu canes semus!…
Pustis de unas cantas dies de libertade illacanada, apo joviadu unu pastoreddu chi deretu m’at fatu abeliare. M’aiat giamadu chin paràulas durches e carignadu comente chi aeret agatadu unu siddadu mannu.
S’incras mi so agatadu ligadu a unu truncu de chessa, cundennadu po semper a fagher sa guardia in su cuile de cussu zovanu ziradu in dimoniu. In istade costas a sole e in ierrru a aba e a bentu, chin una cadena in trugu chi mi permitiat solu de zirare a intundu. Su fritu de s’ierru intraiat a sos ossos, faghendemi trèmere che canna. Cando proiat, s’iferru fiat galu peus… In istade, su sole mi turraiat che cafè in su frunillu, faghèndemi orulare a sa luna intas cando be fiat su sole. Tando pessao a sa mere mia primarza chi, si puru fiat mala, fiat semper menzus de custu mortore de canes e orulao che irvaliadu note e die. Su pastore mi daiat a mandigare cando si nd’amentaiat e a bier ateretantu. Non b’at paràulas chi potant contare tanta suferentzia.
Un’annu e mesu m’est durada sa cundenna: “A su feri feri, intas su ferru perit.” Sa cadena si che fiat ispitida e un’aneddu aiat tzèdidu, torràndemi sa libertade. In antis de mi fuire apo però illiberadu intas su restu de sos presoneris: sas bacas cunzadas in s’istalla dònnia die de s’annu, sos porcos chi creschiant in corrarzos in ue non si podiant mancu zirare, imbrastiados de su ledàmene issoro chi su mere non puliat. E apo dadu sa libertade intas a sas puddas, custrintas a papare e criare chene bider mai nen chelu nen terra.
Avantande e colande, papande su chi sa natura istrinaiat, so arribadu a predas de mare. Una canitedda bianca chìghina, galana che una luna prena, chin su nuscu suu de cane in amore, m’aiat cumbidadu a sa tropa sua de pessones e de canes. Òmines e fèminas biviant in una domo chin sas rodas, non meda còdoma, ma semper aperta a sos istranzos e peri a nois canes. Fiat istrana custa zente. Totu su contrariu de sa prima mere. Pariat chi no àerent mai presse. Issos si godiant sas dies e-i sas notes, cantande, bufande e pipande tziccas chi aiant unu nuscu diferente dae sas chi intas a tando aio nuscadu. Intas nois canes biviamus a su propiu ‘etu. Chene pessamentos e chene depere irvetare sos meres po dònnia mìnima cosa. Cando b’aiat paponzu pr’eddos, be nd’aiat peri po nois: chi èsserent canes de famìlia o canes istranzos. Cando paponzu non be nd’aiat, pessones e canes, totu a zeùnu. Po nois, custos umanos aiant semper paràulas d’istima e losingas durches chi beniant dae su coro. Pariat propiu su chelu de sos canes.
Ma sas cosas bellas, l’ischimus intas nois ànimas a bator pedes, una die o s’atera finint…
Una note, cando pessones e canes fimis jai istestulados in sa corcadorza, chin ispadas e chin lantzas sunt arribados sos carabineris. A boghes de imperiu, ant fatu aperrer e chircadu in dònnia ungrone e in sa carena de sas pessones. Accusados de imperare putènias, chi sos umanos li narant droga, sos carabineris aiant traventadu sas pessones a prejone e nois canes a su canile de cussa bidda.
Canile, po chie no lu connoschet, podet fagher pessare a cosas diferentes… Cussu inue jeo che so finidu, s’assimizaiat meda a una galera de currezu. Cunzados in gabias ischifosas, irvetaiamus a tùnchiu su pagu de mandigu e de aba chi nos daiant. S’impreu de nos dare cara l’aiat unu zovaneddu, iscuru de cude, bènnidu dae Bangalore a chircare fortuna e dinnidade in logos nostros. Ganesh, custu su lumen de su zovanu, faghiat de totu po nos cuntentare. Ma chie cumandaiat, su mere mannu, si colliat pr’eddu su dinare chi sos entes pùbricos li daiant e a nois nos tentaiat a gana. Ganesh, pagadu prus a promintas chi no a dinare, a bortas poniat dae buzacca sua po comporare unu bucone de nos poder campare.
Su mere mannu fiat fatu però de atera pasta. A issu l’interessaiant sos soddos chi dae nois podiat balanzare. Unu sero fiat bennidu chin benzina e ideas malinnas e aiat inchesu totu su chi podiat pigare fogu. Ganesh, ischidadu dae s’apeddonzu disisperadu de nois canes, mesu dromidu, aiat chircadu de sarvare cantu prus ànimales podiat. Su fogu tracheddaiat in sa note mandigande ervas, linna, plàstica e carres de canes chi urulaiant amacchiados.
Ganesh, a sa fine fiat rutu, ispurtìdu in bratzos e in ancas.
Sa zustissia, aiat fatu zustissia. Su mere mannu l’aiant arrestadu chin s’accusa de aer postu fogu po si collire sos soddos de s’assiguratzione.
Su travalladore indianu, una borta sanadu aiat retzidu sa visita de un’òmine antzianu chi, lezende sas novas in su zornale, fiat arrumbadu ameravilladu de s’istima chi custu pitzinnu aiat po sos ànimales. Tziu Tilipeddu, pastore dae cando aiat set’annos, si che fiat agatadu betzu, chene salude e chene parentes a sos cales dassare terrinos e bestiàmene. Po narrer sa veridade carchi parente l’aiat, ma nessunu d’eddos cheriat prus fagher custu travallu de sacrifitziu e de impinnu, in dies de servire e in afussiones. Chi etaret aba, nie, bentu o chi su sole fàgheret tracare sas fozas de sa chessa, a cuile cheriat a andare: sos ànimales irvetaiant su mere.
Tziu Tilipeddu aiat propostu a Ganesh de fagher issu su pastore e de si collire dònnia frutu chi dae su travallu li beniat. Timende prus sos parentes chi non su pitzinnu bènnidu dae innedda, s’antzianu aiat fatu unu papiru notarile in manera chi nemos li poderet parare s’anca, chi esseret po zelosia o chi essere po ingorrosia.
Su vaidanu de su canile, aiat pigadu a mimi e àteros duos canes sarvados dae su fogu e, totu a tropa fimis andados a Bardòsu, sa domo antiga inghirada de pasculos chi tziu Tilipeddu l’aiat cherfidu lassare, menzus de no la bider abandonada e arestada.
Custu logu, fortzis non fiat su chelu de sos canes e nemancu de sos òmines, ma po mene e po Ganesh pariat propiu sa terra prominta, sa terra chi dae semper sonniaiamus.
Sos bighinos de Bardòsu, a sas primas fiant arrumbados unu pagu suspetosos bidende custu pastore nieddu che moro, in cussorzas inue moros mai si nd’aiat bidu, si non cando beniant a bardanare. Pustis de carchi mese, s’ecuilibriu de cosas e de pessos aiat torradu a bincher su disordine e sa zente a sa fine si fiat cumbinta chi intas Ganesh faghiat sas fainas de cuile comente su mere primarzu e su casu e su regotu suu, fiant saporidos cantu sos produtos d’àteros tempos. Fiat unu sardu nou… e non fiat mancu su primu; in totu sa Sardinna custas isperas noas brotaiant dònnia die, torrande vida a logos dae meda abandonados.
Comente apo nadu a cumentzu, jeo so unu cane e pesso che unu cane e, bene chin bene, non cumprendo sas pessones. Diat parrer chi su fine urtimu de sa zente siat de arribare a su bundu po non fagher prus nudda: nen travallos irfadosos e nemancu pipios chi irfados nde dant galu de prus de tzertos impreos. In pagas paràulas: pasu a sa carre e pasu a sa mente, in unu limbu de coros chene bisos, chi làssinant che fozas mortas in su riu de sas istajones. Fortzis est cussu su chelu de sos òmines… lòmpere a sa bundassia, abandonàresi a su nudda e lassare chi s’arrampìu issoro torret a s’iscuriore de su tempus dae su cale fiat naschidu?…

(2018)