ContaCaTiConto
[Antologia de literadura in sardu]

 C O N T O S · R O M A N Z O S  · P O E S I A S  ·  I N T E R V I S T A S · D I T Z O S

Prima pàgina > AUTORES SARDOS > Una campura de bisos e trampas

Dae su romanzu:

Una campura de bisos e trampas

martis 14 abrile 2020, de VITÒRIU SELLA

Sa note tribulata

Cussa note, chi apo colatu in domo, non resessio a picare sonnu. Sos pessamentos meos non fin serenos pro gurpa de su chi mi fit capitatu de notare in bidda mea intro sa creja mazore, unu santuariu chi ammentaio dae pitzinna ricu de pinturas e mazines de sa vita de sos santos. Su chi m’est capitatu de abbaitare m’aiat causatu una imberghita a su coro. E como cussu patire lu cheglio contare, nessi pro mi liberare dae custu anneu. Isco chi su contare istorias a sos ateros, a bias est una meichina chi potet donare serenitate a chie est in tribulia. E tanno ischite chi pacas oras innantis de cussa note, so annata a creja. Canno so intrata dae sa janna printzipale, aio postu sa manu in s’abbasantera pro mi sinnare, ma apenas apo atu sa ruche in sa vronte, non mi est passitu veru su chi aio notatu cara a cara a s’altare novu.
Santu Jorgj, chi punghiat chin s’ispadone su dialu a ghitza de dragu, non bi fit prus. Una manu, pro me disconnota, aiat cucutzatu impresse totu sos colores. Gai mi so abbista chi nun bi fin, pro gurpa de sa matessi vortza distrutora, sos ateros altares apostos dae annos e annos.
Totu sas pinturas tenian una isterrita in colore de late. De cussu colore si mustraiant sos muros de intro de sa creja, sos pilastros e sas culunnas. Sa boveta, a forma de arcu, fit briva de cuddas mazines chi tenian sa vortza, pro chie sichiat sa missa, de ponnere sa mente a fantasiare. Su desizu de biancura non fit bastante pro cuddas manos isempiatoras. Chin sa matessi manera si sun pertos sos altares, sos nitzos e sas culunnas minores, ortzicatas aintunnu e in colore de oro. In cussu istante totu m’est passitu una visione de sa mente, una de cuddas chi potet capitare pro neche de una immaginata o de unu assuconu chi si potet pesare a s’ispessata in calesisiat pessone.
Aio movitu pacos passos in mesus de sa creja pro sapire sa veritate, tanno mi so abbista chi cussu non fit unu sonnu malu, una visione de sa mente, ma unu isempiu veru. Tanta ruina pro me s’est tramutata in abbolotu a su coro, ca in sa pintura de cussu gherrieri chin s’ispadone in manos, chi iferchit su dragu, bidio semper sa mazine de babbu meu.
A note manna, dae prufunnos de s’ammentu, l’imbenio in sos bisos e mi pariat de lu notare torranne a domo chin sa serenitate de istare in cumpantzia mea in cussos annos de pitzinnia, canno, briva de su cufortu de mama, creschio pesata e fata a manna dae s’azudu de mannedda mea. E Santu Jorgi si presentaiat comente unu gherrieri, unu eroe balente e bonu cun s’ispadone in manos. Sas istorias de cussu santu chi cumbatiat in bonu mi las contaiat mannedda, e naraiat chi poniat sas paches, poniat a una ala sa zente mala e uchidiat sas surbiles. In cussa creja, seita paris a issa in mesus a sas feminas mannas de sa bidda, pariat de bidere babbu meu ghiranne a domo, a pustis de aere mortu su dragu, chi aiat fatu prejonera a mama.

Unu bisu, fortzis embo, chi de frecuente mi torraiat in mente, canno senne zovana creschio sola cun sos pessos meos e ammentaio sa bellesa de cussas pinturas. Depites ischire, mi naro Maria Bonaria, chi jeo so torrata a bidda pro sas dies de sa festivitate prus manna. Senas una bisita a sos locos chi tenio in sa mente, comente sa creja, paris a sos nuscos de sas ervas de campagna, fit un’ispinta pro torrare a bidda. Ma cussu isempiu, a pustis chi apo datu palas a sa creja, m’aiat turbatu pro totu sa note, comente capitat a chie de repente perdet unu sentitu de valore. Carica de dispiaghere, pro chircare divagu aio picatu una cartella in colore de arantzu chi tenio collita supra de su parastaggiu. E gai, cussa note abbolotata, chin cussos papiros in manos so torrata in secus de metas annos.

Su tempus de sos istudios in s’universitate de Casteddu si m’est pesatu in sa mente, paris a sa passione chi tanno aio tentu de cumponnere poesias. Unu brincu de idealitate chi aio irbannonatu, ca su iscriere versos mi fit passita una iscritura vana, unu isfogu innutile, una rebellia intima, briva de una chirca de bonu sensu. Cussos versos mi sun colatos in manos, ammentannemi chi los aio batijatos comente ischintiddas, chi ponian focu pro unu istante, ma usinatos a s’istutare. Non fin versos de istima amorosa e de ammajos, ma cantzones chi naschian dae sa passione pro s’umanitate in afannu. A pustis sun istatas collocatas a parte pro sichire sos istudios de s’economia e de sa politica, chi cussideraio de valore pro connoschere sos populos in poveresa e sas terras isfrutatas dae sos istatos prus ricos. Ma cussos versos, chi mi parian una perdita de tempus, non che los aio imbolatos in mesus de sa braja. Los aio collitos, mancu bos isco narrere su proite.
Una cantzone contaiat de sa luna e de sos canes chi istaian a lamenta, comente chi esseren cristianos chi nessune cheriat ascurtare, che a sa luna, chi istat in sos artos chelos, luntana, mala a sichire supra sos canes, supra sos perdentes chi petian zustissia pro sas trampas de s’istoria. Un’atera naraiat de sas feminas che bennian su corpus issoro a filu de sas carreras in foras de Casteddu, in bia Trieste, cara a cara a su palatzu de sa Regione sarda. Cussos versos contaian chi fit unu locu chi s’assimitzaiat a cuddas locandas de bagassumene, uve su dinare acuntentaiat onzi desizu. S’assimitzu non si potiat ovitare, ca fit beru chi dae cussu palatzu bessiat meta dinari pro sos imprenditores, pro sos costrutores e onzi casta de tramperis. Versos chi nessune aiat cherfitu imprentare in libreteddu, ca sos editores cherian collire dinari, che a sos ventuleris chi ispatzan nuscos o saponetas chi promitin a sa feminas de cuare sas pinnicas de sa cara, o pumatas chi innieddan sa carena antis de sos meses de s’istiu.
Cussa casta de imprenteris, pro ammuntonare dinari, non teniat su bisonzu de mustrare in sas librerias pazinas de versos e cantzones caricas de umanitate soferente.
Ammento chi pro una compositzione mi so tratesa prus a longu, ca si latiat dae sas ateras chin sa descritura de sos caddos ingrillandatos. Los notaio in donzi festa acumpantzanne sas prepessones de sos santos. Cussos caddos, chin sos sonatzos intunnu a su tzucru, pomposos e prenos de briu, si movian lassanne in sa carrera cummassos de bratina, mentres feminas bigotas atonaian a borta a borta canticos e precatorias chin sas manos aunitas. Sos chi fin istrainatos istaian arrambatos a su muru, abbaitanne sa bunnantzia de sas petorras de sas feminas, chi si movian precanne in riga, bestitas in costumene e agghindatas chin pendentes de oro e de prata. Cussa parata mi pariat sa testimonìa de una issena de cunfusione, una mistura irriverente, chi achiat irmenticare in sa carrera mazore de sa bidda, chi istimaio meta, su valore de sa funtzione sacra de sa prepessone pro sa Madonna. E gai, sichinne sa letura, mi so ammentata sa die de s’interru de mannedda.
L’aio contatu chin pacas paraulas: una ruche, unu priteru ifatu a su baule, pacos jacaneddos, sos parentes e sos ichinos, totu in cumpantzia de unu tocu de campana deretu a su campusantu.
Sos meicos no aiat fatu in tempus a li torrare animu, ca in cussos annos mancaiat addenote s’assistentzia pro chi istaiat meta male. Mannedda, chi pro me est istata una mama, si nche fit annata serena, chin sa cara briva de sinnos de dolore, comente chi su annare suo s’esseret arressu a su puntu zustu de sa vita sua. Bos naro chi mi so sapita chi cuss’ora l’isetaiat chene timoria. Ne so sicura, ca unu ortaedie, illascanne unu calassu, aio iscobertu sa iscarpas suas nieddas, chi mai aiat postu, e su estire novu de sa dies de sa festa, chi de tantu in tantu, chene cuare sas fricas, aiat mustratu a sos invitatos.
In mesus aio notatu una busta de papiru, chi no mi so permissa de tocare e de leghere su chi bi fit iscrittu intro. Issa fit secura chi cussa die de patimentu sos presentes a s’interru aeren intesu unu tocu solu de càmpana, comente sos priteros aian sententziatu dae meta tempus, pro achere a ischire a sa bidda sa morte sua. S’interru non fit cussu de una pessone rica e carica de benes in dinari, o cussu chi picaiat ifatu sa morte de unu priteru, o de unu proprietariu de terrinos. Sa morte de sos ricos, imbetze, e sa missa in sa creja beniat annuntziata dae tantos tocos de campana. A su priteru, chi ministraiat sa creja, li cumbenaiat, ca colliat prus dinari, unu tantu pro donzi tocu, su chi mancaiat pro isse chin sos interros de sa zente in poveresa.

Sa gana de sichire sa letura de cussos versos, cuatos pro annos, si pesait in manera poderosa. Onzi cantzone fit cumposta in metrica libera, ma chin s’ispiritu de sa chirca de sas paraulas craras, ma pretzisas in s’abilitate de achere a ischire onzi significatu, in manera chi las potiat sapire calesisiat pessone. In cussos versos si pesaian sas peleas pro s’isfrutonzu de sa zente e su desizu de cuncordare cun sos sentitos de sos pessonatzos.
In cussos papiros, collitos vene vene, bi fit totu su bisonzu de una sotzietate prus uguale, chi de frecuente m’aiat ispintu a incollare manifestos de dennuntzia in sos muros, o a istare girellonanne chin sos megafonos supra sos cofanos de sas veturas, ca tanno toccaiat de dare a ischire onzi maluachere, onzi prepotentzia.
Unu munnu novu bi cheriat, pessaio. E lu chircaio diferente dae su chi istaiamus bivenne in sas biddas minores paris a metas ateros zovanos e zovanas chi la pessaian che a mie. Ma metas tenian su cussideru chi cussu fit unu sonniu, una visione de sa mente, comente naraian sos chi campaian cara a donzi ala, comente sa Santa de Vonne. Issos istaian mutos, pessaian a sa butzaca issoro, a sos desizos de artziare in artu, achirranne sos pedes supra s’ischina de chie non teniat difesa, senas afutinnesi de cussu afriscu pro Santu Jorgi, pintatu in sa creja prus manna de sa bidda, chi si pesaiat in mesania de unu piatzale mantesu sicuru dae unu muraglione de granitu, arricatu pro ovitare s’arriscu de rughere a terra in manera repentina.

Chin sa ganosia manna de sos annos colatos in sa zoventute mi nche so corcata. Mi movio de fiancu, ma non resessio a picare sonnu, chircaio s’aposentu zustu, ma non resessio a l’acatare. Non bi l’achio a buscare sa matessi positzione pro pacos minutos, ca cussa ingannia improvisa nc’aiat leatu dae su coro sa serenitate, cussa chi aia pessatu de imbennere ghiranne a domo pro sas dies de sa festa mazore. Afungaio sa cara in su capitzale, ma su desizu de picare unu sonniu pasante, chircanne calesisiat motivu pro istare de acordu chin cudda isempiatura, fit innutile. Ortaio su bisu a cara de sa ventana atzicu iscanzata, arricannemi chin su desizu de l’ispalancare pro isperiare dae cussa artaria s’isterrita de sas cuperturas chi cucutzaian sa bidda.
Ma sa tribulia fit galu presente.
“Sacrilegos!”, muricaio in sa mente, isperianne sa grista de su campanile chi ispuntaiat a forma de ruche dae sa cupertura de sa creja parrochiale, coro de sa bidda e de sos anneos de sa note.
“Totu sacrilegos, senas sos bigotos e sos vasasantos chi naran embo onzi ora ingrenucannesi a su probanu.
Zertu, vasasantos!”, torraio a pessare, tenenne in mente sa lista de sos numenes de sos amicos e de sos connoschentes de su tempus de sa zoventute. Totus aian postu suta sas iscarpas issoro sos primos printzipios, fortzis ca non istat firma sa manera de arrejonare, o fortzis ca onzunu sichit sos profetos suos e chircat locos de potestate a puteriu ghetanne a banna onzi idea. Zertu, senas sos prus fines de cherveddu fin arrumbatos a sa muta. Senas sos amantes de sa liturgia aian ortatu sa palas pro si collocare prus in artu in sas crateas de sa gerarchia: in sos zornales, in s’universitate, in sas bancas, in sos ministerios de sa cultura, in sos abbojs diozesanos, chi aian isaminatu sas pinturas de cucutzare in colore late.
In cussu istante de acoratu dispiaghere, misturatu a sentitos de ingannia, non tenio gana de mantennere sa defensa pro nessune. Tenio s’idea chi totus fin parte de una cunfraria de variseos, de pessones a duascaras chi girellonaian chin dinari frassu in butzaca, prontas a lu semenare a chie lu colliat che dinari bonu pro gastare.
S’unicu cossolu subitanu in cussas oras de sa note pro me fit sa briga, ca no imbenio ateros benefissios, divessos dae cussa dilica meichina, ma chi in cussas oras teniat su donu de illepiare s’anneu. Su primu pro me chi so istata semper serena, beneatinata e media in sos pessos e sos zudissos supra sos custumos de sas ateras pessones. Suta sas manteddas aio sichitu a moricare cussos pessos. Ma s’umbra de s’aposentu meu non donaiat pache.
Ite cumbinare in manera diferente dae cussu arrabbiu? In sa mente si pesaian solu pessos, caricos de ispiritu briantinu e de intima rebellia.
“Totus sun reos”, sententziaio chene redentzione in sa cussentzia mea. “Chie si potiat rebellare, non at isperratu paraula. Chie potiat contare su chi fit capitanne, no at tintu papiru istanne a sa muta, comente aeren tentu sa manos cancaratas dae su vrittu”.
“Totus si sun ingrenucatos, sinnannesi in sa vronte”.
Mi l’aio leata senas chin sa casta de sos intelletuales chi tenian sa mente che unu rellozu chin sas fritzas chi ziran annanne in palas de su tempus presente. In cussas dies metas fin sas proas, ca leghio libros e istorias chi contaian sa pelea de sos banditos, o de feminas chi campaian solu in sa mente de sos iscritores e de chie imprentaiat operas a cumbenientzia de sos mercantes.
Antis de s’arveschita aio chircatu in sa mente solu pessos galanos, ma cussu isetu isperanzosu de nche catzare sos prus caentes e pistiddosos non si fit imberatu. Senas s’ammentu durche de mama, comente sa pessone prus cara, non fit de profetu pro rasserenare cussu turbamentu.
Chircaio de la sonniare, ma non bi resessio, ca cuddu brujore de s’anima ne vatuat ateros, annanghennesi paris a sos ateros.
Chin su desizu de cussa mazine in sa mente, aeddanne chin mene matessi, aio detzisu de partire a ortaedie chin su postale deretu a su portu de Terranova, su chi a sa nove de pacos manzanos innantis m’aiat vatutu a domo.


Si boles, inoghe in Rete podes agatare s’òpera in pabiru : Una campura de bisos e trampas


Vitòriu Sella
Una campura de bisos e trampas
Papiros ed., Nùgoro

UNA CAMPURA DE BISOS E TRAMPAS Maria Bonaria, disterrata in Torino e amantiosa de sas pinturas, ghirat a pustis tantos annos a domo sua pro leare parte a sa festa matzore de sa bidda. Ma issa s’abbitzat de sa presentzia de una filera de grimines novos malos a sejare: sa morte de sas fabbricas e de sos benes culturales chi annos inantis donaian bellura a sas crejas. Pro custu maluachere, semper agguantatu e disconnotu, Maria Bonaria sapit in sa cussentzia sua chi est pre sente unu poderiu chi favorit sa bardania moderna. Issa s’opponnet cun animu poderosu e chircat sos autores e sos favoritores de sas trampas: impresarios affaristas, priteros e pesseris lavamanos, politicos carrieristas e zuiches chi non tenent contu de sos grimines novos. De custa trassa ne pacan su contu sas zovanas, brivas de travagliu, custrintas, innantis de su disterru a Torino, a cumbattere pro sa dignitate issoro. A s’ala de Maria Bonaria bi sunt Marianna e Franzisca, duas travagliatoras chi, ughinne dae sa bidda issoro, si pican iffatu una valliza de documentos. Sun sa proa de sa bardana moderna. De custos papiros n’at bisonzu senas Antoni, istudente in s’Univesitate de Torino, chi chircat sa neche de sa morte de sas biddas minores e de sa derruta de sa fabbricas. Chitas innantis de sa presentata de sa tesi sua de laurea, sos politziotos in su portu de Civitavecchia l’abbojan comente chi eseret unu eversore e lu trattenent pro tantas oras. Ma sa veritate, macari chin sentitos de amargura, bessit a campu a sa crara.